हामी को हौं?

आरती भोग परिवार पूर्ण रूपमा नाफा रहित (Non-Profit) संस्था हो। यसको आर्थिक लाभ होइन, सेवा नै मूल उद्देश्य हो। करुणा र मानवताको पवित्र अभ्यास हो।

हाम्रो सम्पूर्ण उद्देश्य भनेको कुनै पनि सहयोग, दान र योगदानलाई कुनै व्यक्तिगत वा व्यावसायिक लाभका लागि प्रयोग नगरी विपन्न बिरामी, कुवारा र असहाय रहीका व्यक्तिहरूको भोजन, उपचार सहयोग र राहत सेवामा समर्पित गर्नु हो।

सेवा, स्नेह र मानवताको पवित्र अभियान — "नर सेवा नै नारायण सेवा हो" भन्ने सनातन धर्मको दिव्य आदर्शलाई आत्मसात् गर्दै आरती भोग परिवारले मानव सेवाको प्रवर्द्धनलाई निरन्तर अगाडि बढाइरहेको छ।

वि.सं. २०८१ साल मंसिर ३० गते पावन धान्यपूर्णिमा (यमरी पूर्णिमा) को शुभ अवसरमा शुभारम्भ भएको यस सेवामूलक अभियानले समाजका दुःखी, पीडित र अभावग्रस्त मानिसहरूको जीवनमा आशा, आत्मबल र सहयोगको योगदान दिन उद्देश्य राखेको छ।

धार्मिक आस्था, करुणा र परोपकारको भावनाबाट प्रेरित भई स्थापना भएको आरती भोग परिवार आज सेवा धर्मलाई जीवित पार्न संस्थाको रूपमा परिचित बन्दै गएको छ।

डा. बिनुबाबा अर्यालको अध्यक्षतामा विधिवत् दर्ता भएको यस संस्थाले शहीद गंगालाल राष्ट्रिय हृदय रोग केन्द्रमा उपचाररत बिरामीका कुवाराहरूलाई दैनिक निःशुल्क भोजन वितरण गर्दै आएको छ।

अस्पतालको कठिन परिस्थितिमा दिनरात बिताइरहेका परिवारहरूलाई भोजन उपलब्ध गराएर संस्थाले मानवताको सेवामा महत्वपूर्ण योगदान पुर्याउँदै आएको छ। यसैगरी, आर्थिक रूपमा अत्यन्त कमजोर तथा असहाय बिरामीहरूलाई आवश्यक नगद सहयोग दान गरी संकटमा राहत र आशाको आधार बन्ने प्रयास गरिरहेको छ।

आरती भोग परिवारका लागि सेवा केवल सामाजिक उत्तरदायित्व होइन — यो ईश्वरप्रतिको समर्पण र धर्मको वास्तविक साधना हो। संस्थाको मूल विश्वास छ: प्रत्येक भोकाएको पेटमा अर्पण गर्नु भनेको भगवानलाई नै नैवेद्य चढाउनु हो; प्रत्येक आँसु पुछ्नु भनेको पुण्य संचय गर्नु हो; र प्रत्येक सेवाको कार्य वास्तवमा ईश्वरको आराधना हो।

यही भावनाका साथ संस्थाले भोजनलाई प्रसाद, सहयोगलाई करुणा र सेवालाई साधनाको रूपमा अँगाल्दै आएको छ।

"सर्वे भवन्तु सुखिनः, सर्वे सन्तु निरामयाः" भन्ने वैदिक मंगलकामनालाई आत्मसात् गर्दै आरती भोग परिवारले समाजमा प्रेम, स्नेह, सहानुभूति र सहयोगको संस्कार विस्तार गर्न संकल्प लिएको छ।

आज आरती भोग परिवार केवल एउटा संस्था मात्र होइन — मानवता, धर्म, करुणा र निःस्वार्थ सेवाको पवित्र तीर्थ बन्दै गएको छ। आगामी दिनहरूमा पनि पीडित, असहाय र आवश्यकतामा रहेका मानिसहरूको जीवनमा आशा र सहयोगको योगदान फैलाउँदै सेवा धर्मको यात्रालाई अझ सशक्त बनाउने दृढ संकल्पका साथ संस्था अगाडि बढिरहेको छ।